Bo ke sa kon pa skibi bo propio karta di keho? Lesa aki e mihó tepnan pa skibi i manda bo karta di keho òf nota di opheshon (bezwaarschrift).
Bo mester di un karta di keho? Kisas bo ta lesa e artíkulo akí pasó bo ke entregá un keho, pero bo no sa presis kon pa hasi esaki. Na momentu ku bo ke entregá un keho, un kos ta sigur: bo no ta di akuerdo ku e situashon i bo ta deseá un otro solushon. 

Lei ta bisa ku bo mester keha. Si bo no hasi esaki, pues si bo keda ketu, konforme di lei bo ta indiká ku bo ta di akuerdo ku e manera kon kosnan a kana. Hopi di nos mester kustumbrá ku e pensamentu akí, pasó den nos bida diario kehamentu ta mirá komo algu fèrfelu i mihó nos evitá pa hasi esaki. Pues ta hopi importante pa bo mes pa komprondé e pakiko bo ke entregá un keho òf nota di opheshon i tambe kiko presis bo ke logra ku e karta òf nota di opheshon.  

Den e artíkulo akí mi ta splika e diferensha entre un karta di keho i un nota di opheshon i tambe kon kisas bo por skapa gastunan haltu di un abogado dor di skibi i manda bo propio karta òf nota di opheshon. Tambe mi ta mustra na unda mester entregá kua keho. Na final di e artíkulo bo ta mira un muestra grátis di un karta di keho i di un nota di opheshon. Bo lo por usa nan komo inspirashon. 

Laga nos start mes ora!

E diferensha entre un karta di keho i un nota di opheshon (bezwaarschrift)

Ora bo kumpra un produkto, òf bo hasi uso di un servisio ku bo no ta satisfecho kuné, bo por ekspresá bo mal kontentu den forma di un karta di keho. Dependé di e situashon bo mes por evaluá i disidí si un karta ta nesesario mes ora. Òf si tòg ta mihó pa hasi un yamada promé pa wak si tin un solushon mas fásil pa e situashon. 

Ku un karta di keho bo ta laga sa ku bo no ta kontentu ku un produkto òf servisio. Tambe si bo tin un solushon mas fásil, bo por menshoná esaki tambe mes ora den bo karta. Di e manera akí huntu por buska un solushon ku kisas e negoshanté no a tene kuenta kuné. 

Ojo! Bo a sufri daño di un produkto òf servisio? Mester pone e negoshi òf persona responsabel pa esaki promé. Na hulandes nan ta yama esaki: “aansprakelijk stellen”.

Un nota di opheshon (bezwaarschrift) bo ta entregá ora bo no ta di akuerdo ku un desishon ku nan a tuma. Por ehèmpel: un faktura di impuesto (na hulandes belastingaanslag) òf un but di belasting; un “schriftelijke waarschuwing” na trabou; desishon ku gobièrnu a tuma tokante di un sierto situashon ku bo no ta di akuerdo kuné òf un but di polis etc.  E kontesta riba bo karta di keho por ehèmpel, tambe ta un sierto desishon. Si bo no ta di akuerdo ku esaki bo ta bai “in bezwaar” dor di manda un nota di opheshon. 

E faktura di impuesto ta korekto, pero bo no por paga e montante den un biaha? E or’ei ta mihó pa hasi un areglo di pago na lugá di manda un nota di opheshon. 

Ojo! E entrega di un nota di opheshon ta mará na un periodo determiná. Ke men hasi esaki na tempu! E informashon akí hopi biaha ta skibí patras di e karta ku bo a risibí di e instansia konserní.

Sa na unda bo mester keha

Ta hopi importante pa bo sa na unda bo mester ta pa entregá bo karta di keho. Lo ta un pena ku bo a hinka tempu i esfuerso den bo karta i entreg’é al final na e adrès robes. Si bo entregá bo karta di keho na e adrès robes bo ta kore e riesgo ku lo no atendé bo kaso. Evitá esaki dor di informá bo mes delantá tokante di e pasonan ku bo mester tuma pa entregá bo keho. Kualke kos, semper tira un bista riba e wèpsait di e kompania òf organisashon i buska si nan tin un prosedura di reklamo / keho (na hulandes klachtenregeling). Si nan no tin esaki, lo bo por yama semper i hasi e simpel pregunta: Na unda mi por entregá mi karta di keho? Den e yamada akí bo no tin mester di bisa mashá di bo keho ainda. Esaki ta djis un yamada kòrtiku ku 1 pregunta, pa abo sa na unda bo por entregá bo keho. 

Keho tokante di un dòkter (òf spesialista), notario òf abogado

E entrega di un keho tokante di un spesialista, notario òf abogado ta diferente. Si un dòkter/spesialista, notario òf abogado kometé un eror ku tin konsekuensia dañino pa bo, bo mester pone nan responsabel (na hulandes aansprakelijk stellen) pa esaki promé. Pues lo bo mester por demostrá kua (i kuantu) daño presis bo a sufri. Tene na kuenta ku no ta tur ora esaki ta mes fásil pa prueba. Pa bo por haña un kompensashon / daño di perhuisio, bo mester kuminsá un proseso sivil (un demanda) tambe, banda di bo karta di keho. Kon ku bai bin, semper ta bon pa pone bo mal kontentu riba papel dor di skibi un karta tokante di e situashon. 

Sea na e adrès korekto. Por ehèmpel: Bo tin un keho tokante di un dòkter na Kòrsou? Entregá bo karta di keho na Medisch Tuchtcollege di Kòrsou. Si bo tin un keho tokante di un notario na Kòrsou, bo mester ta na Kamer van Toezicht Notariaat di Kòrsou. Bo tin un keho kontra di un abogado? Entregá bo keho na Orde van Advocaten di e isla òf país konserní. Tene na kuenta ku kada isla òf país den reino hulandes tin nan propio adrès pa entregá esakinan. Tira un bista riba e imahen akibou.  (maak wegwijzer ook in Papiamentu!)

Tene na kuenta ku Medisch Tuchtcollege, Kamer van Toezicht Notariaat i Orde van Advocaten no por duna un kompensashon, ni nan por duna but òf laga un hende bai será. Si bo ta haña ku bo meresé un sierto kompensashon, bo mester start un kaso sivil apart pa esaki. Ta hopi importante pa ta na altura di esaki, pa evitá desapunto. 

Kon pa manda bo karta di keho òf nota di opheshon?

Si bo ke entregá un keho serka un kompania òf instansia, ta importante pa semper wak bon riba nan wèpsait i chèk si nan tin un prosedura di reklamo.  Wak si ta èksistí un prosedura spesial pa esaki i tuma e pasonan stipulá pa entregá bo keho. Si e kompania òf instansia no tin un prosedura, ta importante pa informá promé na unda, (preferibel un adrès di i-mail) bo por entregá bo keho. Na momentu ku bo ta hasi e pregunta akí no ta obligatorio pa duna bo nòmber si bo no ta sinti bo komfortabel ku esaki. Ta un pregunta general bo ta hasi. 

Si ta posibel, ta mihó pa manda bo keho òf nota di opheshon ku i-mail. Di e manera akí outomátikamente bo tin un kopia pa bo mes inkluso e fecha i e persona ku e mensahe ta dirigí na dje. Si bo no tin e posibilidat pa manda bo karta via di e-mail, ta importante pa semper prent bo karta (por lo ménos) dos biaha, pa bo por warda un kopia di e keho entregá pa bo mes. Laga e kompania òf instansia stèmpel bo kopia ku fecha, pa bo por demostrá ku nan a risibié di bèrdat, riba tal i tal dia. Ora ku nan kaba di pone un stèmpel lo bo por saka un pòtrèt di esaki ku bo telefòn selular, ya bo tin esaki digitalmente tambe. 

Tene bo emoshon pa bo mes

Bo ke pa nan komprondé bo situashon, pa por haña un solushon. Kisas zundramentu por yuda un tiki i temporal, pero hopi biaha e no ta un solushon di bèrdat. Den mi artíkulo Dikon skibimentu ta asina importante, bo por lesa kon bo por influenshá bo emoshon na un manera positivo ku skibimentu. En todo kaso, skibimentu ta yuda bo evaluá bo situashon un biaha mas. Bo ta mal kontentu i bo ta duna bo mes e chèns pa skibi tur loke bo tin riba bo kurason. Hasiendo solamente esaki, ya kaba ta aliviá bo un tiki, pasó skibiendo bo ta brek bo emoshon inkonsientemente. Despues di e stap akí bo por filtra e konsepto di bo karta, dor di saka tur loke ku ta emoshon. Di e forma akí bo por fókùs mihó riba e núkleo di e storia. Bo ke pa e persona ku lesa bo karta, komprondé loke bo ke bisa di bèrdat i no solamente ku bo ke zundra. Semper tene na kuenta ku kisas esun ku ta lesa bo karta, no ta esun ku ta responsabel pa bo situashon fèrfelu.

Tep: lo bo por puntra un amigu di konfiansa òf un persona ku tin noshon di e situashon, pa tira un bista riba bo delaster vershon di bo karta. Wak si nan ta komprondé loke ku bo ke bisa ku bo karta.

Un abogado por ta útil, pero no ta semper nesesario òf obligatorio

Pelíkula i seri ku nos ta wak, ta duna nos e impreshon hopi biaha, ku ta solamente un abogado lo por yuda nos, na momentu ku tin kaso di inhustisia. Ta bèrdat ku un abogado a studia spesialmente pa esaki. E mester sa presis kon pa atendé bo situashon. Pero tambe ta bèrdat ku un abogado por ta bastante karu.

Si bo gana òf pèrdè, semper mester paga

Tambe mester tene na kuenta ku, si bo pèrde bo kaso (ni maske abo i bo abogado haña ku bo tin rason) lo bo tin ku paga e abogado pa su tempu. Tambe pa su konosementu i su esfuerso ku e a hinka den bo kaso. Na banda di esaki, sa pasa tambe ku por solushoná kasonan simpel sin ku un hues mester tuma lugá den e proseso. Den un kaso asina e abogado ta tuma kontakto (hopi biaha entre otro ku karta) ku e otro partido. I asina wak kon por buska un solushon mas fásil. 
Den sierto kaso, si e situashon eskalá di tal manera ku un demanda hudisial ta nesesario, un abogado por ta obligatorio. Mayoría kaso di labor òf di konsumidó, no ta rekerí un abogado. Si bo mes ta komprondé bo situashon bon, i bo sa kon pa splik’é na un manera ku otro hende ta komprondé, bo no tin mester di un abogado. Es mas, abo konosé e historia di bo situashon mas mihó ku kualke persona. I abo tin mas interes pa un solushon den bo situashon ku kualke persona. Pues lo bo hasi mas esfuerso den bo situashon ku kualke persona, no ta bèrdat?

Si e situashon ta muchu difísil i bo no sa kon pa atend’é, si bo mester buska yudansa. Yudansa por ta un famia di bo òf un persona di konfiansa ku tin konosementu di e situashon. Si di bèrdat bo no tin niun opshon mas, i si bo tin e sèn, bo por buska e abogado ku bo ta kere ku por yuda bo mas mihó ku bo kaso. 

Muestra di karta grátis

Kon pa skibi bo propio karta di keho? Klek aki bou pa e muestra grátis di karta di keho inkluso splikashon.

Klek aki pa e muestra grátis di nota di opheshon inkluso splikashon.

Bo a entregá bo keho, pero tòg no tin un solushon

Pues awor bo sa kon pa skibi bo propio karta di keho. Pero, si bo a entregá bo keho korekto i bo no ta sali afó ku e kompania òf instansia (di gobièrnu)? E or’ei bo tin un par di opshon mas! Den kaso di un kompania, bo por skohe pa kana e kaminda di hues, despues ku bo no a keda kla ku e kompania mes. Si bo a entregá un keho serka un instansia di gobièrnu i bo no ta saliendo afó, lo bo por dirigí e sigiente karta na Defensor di pueblo, Ombudsman. Kòrsou i Sint Maarten tin nan propio Ombudsman. Boneiru, Statia, Saba (islanan BES) i Hulanda ta kompartí un Ombudsman ku nan ta yama Nationale Ombudsman.  Sorprendentemente Aruba no tin un Ombudsman. Tampoko ta kla na ken siudadanonan di Aruba por dirigí nan mes na momentu ku nan no keda kla ku nan keho serka un instansia semigubernamental. 

Duna nan tempu pa kontestá

Ta bon pa komprondé ku e kompania òf instansia no ta warda riba bo keho. Nan tin nan kosnan diario di hasi. Ke men tene na kuenta ku nan mester traha tempu pa lesa bo karta, pone e persona òf departamentu konserní na altura, atendé bo karta interno i pa despues por kontestá bo i bini ku un solushon. Kompanianan ku ta tuma nan klientenan na serio, semper lo duna un konfirmashon ku nan a risibí bo keho. 

Dependé di e situashon bo mes por evaluá mas mihó, si ta un bon idea pa chèk ku nan despues di un of dos siman, si bo no a tende nada. No laga hinter un luna pasa si no. 

Bo tin pregunta?

Bo tin pregunta di e artíkulo ‘Kon pa skibi bo propio karta di keho’? Òf si bo no ta sali afó ku bo karta i bo ke pa mi skibi òf revisé pa bo? Manda mi un mensahe!