Kiko ta ‘journaling’?

‘Journaling’ ta zona nobo i moderno i kisas hasta un tiki intimidante, pero simplemente ta un palabra na ingles pa skibi den un diario (na hulandes dagboek). Último tempu nos ta mira i tende hende papia mas tokante e tema akí i tambe a inventá diferente ‘gadgets’ pa stimulá hende skibi diario mas tantu.  Di skreft kolorido i komplementario te na pèn i stekernan úniko ku ta yuda bo dibertí na momento ku bo skibi bo pensamentunan di tur dia.

Skibimentu den un diario ta eksistí pa hopi aña

Skibimentu den un diario ta algu ku ta eksistí pa basta tempu kaba. Kisas bo konosé e buki na hulandes ku yama Het Achterhuis. Tambe tin un vershon na Papiamentu di dje yamá E Kas Patras. En realidat e buki popular akí ta e diario  ‘Kitty’ di e hóben hudíu Anne Frank, ku tabata skibi su pensamentunan i eksperiensianan miéntras ku nan tabata skondí den un kas na Amsterdam durante di Segundo Guera Mundial. Pues tambe bo por mira e skibimentu den e diario di Anne, tambe por ser mirá komo ‘journaling’. 
Sigi lesa pa wak kon bo por start awe mes ku journaling!

“Papel tin mas pasenshi ku hende “

– Anne Frank –

Skibimentu di nos pensamentunan ta algu ku diferente di nos a hasi tempu ku nos tabata mas hóben. Skibi bo rabia òf pensamentu salvahe den un buki òf skreft, despues skonde esaki bon di moda ku niun hende por hañ’é pa lesa. Tabata sinti bon i liberá pa hasi esaki, pero di un òf otro manera hopi di nos no a sigi ku esaki. I ta presisamente ora nos bira mas grandi, nos tin mas di haber ku kosnan manera strès, miedu i depreshon. ‘Journaling’ entre otro ta yuda bo kontrolá bo emoshonnan, ku ta yuda bo mehorá bo salú mental. 

Bo sa sinti tin ora ku bo tin muchu kos na bo kabes i mas i mas bo ta lubidá e kosnan importante? E or’ei esaki ta bo señal pa kuminsá ku ‘journaling’ awe mes. Papel tin mas pasenshi ku hende i nunka lo e husga bo, hasi bofon òf redu di bo òf zundra bo. E tin pasenshi te ora abo ta kla pa ‘bisa’ loke ku bo ke i manera bo ke. 

Kohe un pèn i papel awe mes i kuminsá skibi. 

7 tep pa kuminsá ‘journal‘

Kiko ta journaling i kon bo ta start?
“First things first.”

Rèk bo kurpa un ratu. Bo por hasi esaki sintá tras di bo mesa, dor di rèk bo brasanan, mannan i pòlsnan. Si bo tin e posibilidat pa lanta para, hasi esaki i rèk hinter bo kurpa un ratu. Asina aki bo ta deshasí fásilmente di tenshon ku bo tin den bo kurpa sin bo sa. Si bo no a yega di hasi esaki ainda, e por mustra i sinti un tiki straño, pero despues di un par di biaha lo bo ripará ku bo mes gusta pa rèk bo mes un ratu, promé bo tuma bo tempu i ‘journal’ pa bo mes. 

Kòrda bon: nada ku bo skibi ora bo ta “journal” ta robes. Erornan di ortografía no ta konta aki mes, esaki ta di bo i pa bo.

1. Tep numero uno: Djis kuminsá

No pensa mashá, tokante di kiko, kon, ki dia, ken ta wak, kiko nan ta haña, pero djis kuminsá. Kuminsá na skibi: e fecha di awe, e dia i na unda bo ta sintá aworaki. Si mas kos drenta bo kabes, bo por skibi esakinan, pero si nada no drenta bo kabes, no ta nada. Esaki so, tabata sufisiente pa awe, pa bo kuminsá kustumbrá ku skibimentu. Tambe bo por skibi por ehèmpel, kon bo ta sinti bo awe. Kòrda ten’é simpel i agradabel pa bo mes.
Otro idea pa bo “journal” ta: skibi lista òf hasi un “brain dump“. Skibimentu di lista ta un di e maneranan di mas fásil pa “journal”. Tambe e ta algu hopi efektivo, pasó na mes momento bo ta práktika bo mes pa hasi kos mas organisá i strukturá. Traha lista di meta ku bo ke logra awe, e siman òf e luna akí. Ora ta trata di un “brain dump”, bo ta skibi tur kos ku drenta bo kabes, sin husga nan. Bo por kompar’é ku un baki di plèstik yená ku tur sorto di kos i bo ke organisá e kontenido di e baki. Bo por bòltu e baki i tira tur kos abou den un biaha, sin husga. Awor aki e baki di plèstik ta bashí i bo tin espasio pa kuminsá ordená tur kos.
Meskos ta ku nos pensamentu. Outimátikamente bo ta krea espasio mental dor di djis skibi sin husga e loke ku bo ta pensa. Inkonsientemente bo a distansiá bo mes di kosnan ku ta dal rònchi den bo kabes. Den nos bida diario, i sigur awor aki ku tur e desaroyonan, tin hopi kos ta pasa. Pa e simpel echo akí, ta sumamente importante pa tuma un par di minüt tur dia i distansiá bo mes di tur pensamentu ku ta dal rònchi den bo kabes.

2. Skohe un skreft spesial pa bo ‘journal’ aden

Awendia tin diferente sorto di “journal” na diferente koló i preis. Skohe unu ku abo ta sinti bo konfortabel kuné. E no tin nodi di ta karu.

3. Palabrá ku bo mes un momento spesífiko

Palabrá ku bo mes un momento spesífiko pa bo skibi. Mas mihó ta pa bo hasi esaki promé kos ora bo spièrta mainta. Purba di hasi skibimentu un kustumber di tur dia i lo bo ripará ku kada biaha e ta bai mas fásil. No sea estrikto ku bo mes. Un palabra so tambe ta bon. Por ehèmpel bo por djis skibi: Danki pa e dia di awe òf danki ku mi por hala rosea…algu simpel.

4. Skibi ku man

Usa pèn i papel. Purba di hasi esaki, pero semper hasi e loke ku abo mes ta preferá sin gaña bo mes. Aparatonan elektróniko, manera bo “smartphone” tin otro distrakshon ariba (Whatsapp, Instagram, Facebook etc.) ku lo por stroba bo proseso di praktiká bo mes pa skibi tur dia. Den e artikulo akí bo por lesa mas tokante di e ventaha di skibimentu.

5. Lesa bo mes tekstonan bèk

Lesa bo mes tekstonan bèk i ta konsiente di bo desaroyo mental. Despues di tantu tempu, tur fin di luna òf ora aña kaba, lesa bo pensamentunan bèk. Hasi esaki. Lo bo ta orguyoso di bo mes.

6. No tin regla

Mi favorito: No tin regla. Skibi loke abo ke! Kuantu ku bo ke, kon largu òf kortiku ku bo ke ku hopi òf niun eror den bo ortografia. I ounke esaki por zona hopi kaótiko, tin hopi magia ta pasa ku lo yuda bo pa restu di bo bida. Hasi’é i lo bo mira.

7. Skibimentu no ta obligatorio

Delaster tep: Ni maske mi mishon ta pa mas hende kuminsá skibi, den e kaso akí lo bo por ‘doodle‘ (un kombinashon di pinta i skibi) òf pinta so, si esaki ta traha mihó pa bo.

Tep: Riba internet mi a deskubrí un ‘werkboek‘ di e Kas Patras tradusí dor di Chila Bolivar i diseñá dor di Joost Luk. Tira un bista i prent e pa bo yu(nan) praktiká skibimentu den un diario

Pregunta?

Si bo tin pregunta tokante e artíkulo ‘Kiko ta ‘journaling’?’, bo por manda mi un mensahe privá.