Pakiko skibimentu ta asina importante? Lesa aki 16 motibu.

Bo ta kòrda kon bo a sinti bo dia bo mester a skibi pa e promé biaha den bo bida? Kon bo tabatin bo pèn tené den bo man, e konsentrashon ku tabata nesesario pa bo por a forma kada lèter presis mané yùfrou tabata ke? Hopi di nos a lubidá e momento spesial akí. Pa e artíkulo akí no ta importá si bo ta un eksperto den skibimentu òf si ta solamente ora di manda un mensahe via di ‘whatsapp’ bo a skibi algu. Mi meta ta pa kòrda bo kon importante i realmente kon dushi skibimentu por ta.

Den e teksto aki bou lo mi toka kòrtiku e tema di kon nos selebre ta traha i tambe kon skibimentu por influensiá esaki positivamente. Tambe lo mi skibi tokante e influensianan positivo ku skibimentu tin na momento ku por ehèmpel bo ta rabiá òf desapuntá i ku bo emoshonnan tin ma’i tuma kòntròl. 

Finalmente mi ta duna bo 16 motibu di kon skibimentu ta asina importante, i lo bo ripará ku skibi regular lo duna bo kreatividat un ‘boost’ enorme. Hasiendo esaki bo por mehorá bo kapasidat di pensa i siña kosnan nobo. 

Ban p’e!

Skibimentu ta un akto kompleho

Por ehèmpel, purba di skibi un frase di tres palabra, mientrastantu bo ta wak bo dilanti i kana bai kushina. Mi ta kasi sigur ku esaki lo no bai fásil. Esaki ta pasó skibimentu ta un akto kompleho ku ta involukrá hinter bo kurpa. Pa por skibi bon, bo mester di bo wowonan, bo selebre, bo nèk, lomba i di mes e múskulonan den bo dedenan. 

Debí na e kolaborashon di diferente múskulo den nos kurpa algu mágiko ta okurí. Moveshon di mas ku 10.000 neurotransmisor ku ta sòru pa sierto desaroyo importante den nos kurpa i na mes momento un práktika mental. Un ehèmpel di un práktika mental aktivo i ku no ta kosta sèn, ta skibimentu. 

Kòrda bon ku mas tantu bo praktiká, mas mihó bo ta desaroyá e abilidat. Meskos ku un yu ku a kaba di nase no por kore un maratòn mes ora, pasó e mester siña kana promé, meskos nos mester tin pasenshi i praktiká skibimentu.  Asina nos por saka mas tantu for di dje. Pasó dor di skibi regular tokante un tópiko spesífiko, konekshonnan nobo den nos selebre ta ser kreá. No ta importá bo DNA òf edat. Mágiko tòg?!

Bo tin strès? Skibi!

Bo ta rabiá? Desapuntá? Òf al kontrario: bo ta hopi entusiasmá i kontentu tokante di algu ku a pasa? Skibié!

Dor di emoshon nos ta pará mas serka di loke ku nos ta sinti i esaki ta trese diferente palabra outomátikamente den nos kabes. Momentunan ku nos ta felis i kontentu nos tin hopi kos di kompartí ku mundu. Den forma di kòmbersashon nos ta purba entusiasmá otro hende i purba di laga nan sinti loke nos a eksperensiá. Ta bon pa skibi e palabranan ku drenta bo kabes na e momentonan akí. Na unda i kon ku bo hasi esaki no ta importá. 

Skibiendo bo ta kapturá momentonan dushi ku despues di un temporada, bo por rekòrdá bèk ku un sonrisa. 

Ora nos ta rabiá òf desapuntá tambe tin yen di palabra ta drenta nos kabes. Ora ta trata di emoshonnan negativo, no ta un bon idea pa kompartí e palabranan ku drenta nos kabes ku mundu mes ora. Pero kiko hasi ku tur e palabranan di rabia ku ta keda den nos pensamentu, i ku preferiblemente nos no ke bisa nan, pero ku sí ta keda manifestá den nos kabes? 

Si bo neglishá esaki, e situashon lo eskalá na un sierto momento i lo bo por hasta bira malu òf haña bo den un situashon ku bo no ke ta aden. 

Den kasonan asina aki skibimentu ta un santu remedi, pasó bo ta libra bo mes di tur e palabranan negativo ku ta kana ‘wandelmars’ den bo kabes. 

Di mes esaki ta importante pa hasi pa bo mes na promé lugá, pasó skibiendo bo rabia òf desapunto bo ta duna bo mes pas mental outomátikamente. Ora bo tin di haber ku inhustisia sigur ta un bon idea pa skibi tokante di esaki pa bo mes. Por ehèmpel  si bo hasi uso di un servisio ku bo no ta kontentu kuné. Ban bisa ku koriente a bai i tabatin un ‘blackout’ i e tres aparatonan di mas importante den bo kas a kima. Pero tambe, si por ehèmpel bo tabatin di haber ku intimidashon seksual na trabou i bo ke entregá un keho ofisial tokante di esaki. Mas informashon di kon bo por skibi un bon karta di keho bo por lesa den un otro artíkulo. 

Pues pa bo por ta konsiente di bo emoshonnan i pa por kontrolá nan, skibimentu ta un manera hopi simpel, efektivo i grátis pa praktiká esaki. Por ehèmpel situashonnan impreshonante manera optené un sierto diploma ku bo a traha hopi duru p’e òf pèrdè un ser kerí, òf haña retiro di bo trabou i bo no ta di akuerdo òf e miedu ku bo ta sinti pasó bo mester duna un presentashon importante na un grupo grandi ku bo no konosé. Kiko ku ta ku tene bo okupá mentalmente muchu largu, semper ta bon pa skibi tokante di esaki pa bo mes. Niun otro hende no tin mester di mira e vershon akí (ainda).

Idioma, gramátika òf nèchi skibí no ta importante

Ora ku bo ta skibiendo pa bo mes, no ta importá den kua lenga bo hasi esaki, òf si bo gramátika ta bon i si nan por komprondé bo lèter. 

Bo ta okupá solamente pa bo mes, i e úniko kos durante di e proseso akí ku ta importante, ta ku bo ta libra bo mes di e maratòn di palabra den bo kabes, dor di saka nan for di bo kabes i pone nan riba papel. Mas tantu biaha bo hasi esaki, mas kómodo bo ta sinti bo ku e idea di skibi i mas lo bo kuminsá gusta skibimentu, i lo bo ripará ku e ta yuda di bèrdat. Pasó skibiendo bo emoshon- i miedunan riba papel, outomátikamente bo ta redusí e efekto ku nan lo tabatin riba bo. 

Papia ku otro hende tin ora por hasta kousa ku bo ta haña mas rabia den bo kurpa, pasó kontando bo por rebibá e emoshon negativo atrobe. Na banda di esaki tin e chèns ku e persona ta husga e situashon, sin ku abo mes sa ainda kon pa resolv’é. Ke men, semper purba di skibi pa bo mes, e kosnan ku ta kansa bo mentalmente. 

Pero skibimentu ta hopi mas ku, solamente pega par di lèter pa forma palabra ku ta tene bo okupá.

Bo tabata sa ku..
nos ser humano ta e úniko ser riba e planeta akí, ku tin un selebre i ku por skibi tambe?
Lesa e frase un biaha mas i realisá kon spesial skibimentu ta hasi nos.

Lesa aki 16 motibu pakiko skibimentu ta importante

..i ki efekto positivo e por tin riba nos selebre

1. Sin skibimentu no tin historia

Laga nos kuminsá na prinsipio. Sin skibimentu, awor aki nos lo no konosé un historia. No ta tur informashon ku ta skibí den tur buki di historia ta korekto, pero sin e bukinan akí nos lo a sa hopi mas tiki òf kisas nada di e loke ku a pasa den historia. Dor di e tekstonan skibí, nos por siña di pasado i haña e oportunidat di siña di sierto eror i asina krese. Skibimentu ta eksistí na yen di forma i pa siglo. Djis pensa riba eskritonan riba palu i blachi. Den gròt, riba piedra òf riba kueru di bestia. Skibimentu ta algu ku solamente nos komo humano, sernan ku un selebre, por hasi. I esaki ta algu hopi spesial.

2. Skibi pa bo kòrda

Na momento ku bo skibi algu, bo ta redusí òf eliminá e chèns ku bo ta lubid’é. Ora bo skibi algu na man, inkonsientemente bo ta mas largu okupá ku e detayenan ku bo mester skibi. Hasiendo esaki bo ta kòrda e informashon mas fásil i bo selebre ta haña e chèns di apsorbá i organisá e informashon mas mihó. Ora bo selebre a hasi esaki, outomátikamente bo a kòrda e informashon.

3. Hisa konsentrashon i baha strès

Skibimentu tur dia ta hisa bo konsentrashon, miéntras e ta baha bo strès!
Debí ku bo ta usa asina tantu múskulo pareu den bo kurpa durante skibimentu, bo ta haña bo ta konsentrá obligá, pues bo no tin tempu pa kòrda riba otro kos (negativo). Dor di keda pensa mes un kos tras di otro, strès ta sluip i drenta nos kurpa, hopi biaha sin ku nos tin noshon di esaki. Na momento ku nos ta na altura di esaki, tin ora ya nos ta sintá na dòkter òf spesialista, lástimamente. Esaki no tin nodi di yega asina leu, si nos skibi tur dia un tiki. Lesa aki un par di tep pa skibi tur dia den bo ‘journal‘.

4. Skibi ta yuda nos salú mental
(‘Mental health’)

Kontinuando riba e punto anterior: skibimentu ta stimulá nos salú mental. Por fabor no balotá e poder di skibimentu! E ta un manera sumamente poderoso pa kita e pensamentunan fèrfelu òf e miedunan for di bo mente. Por ehèmpel: bo ta na luto, òf bo a pleita ku bo ser kerí, bo a ser tratá inhustu òf nan a kita bo for di trabou? Na momentunan asina aki skibimentu por ta un manera efektivo pa bo hèndel esaki. Ta importante pa skibi bo pensamentunan pa por dil ku miedu, depreshon i otro problemanan síkiko. Pero no warda te ora un spesialista diagnostiká esaki. Tende bon di bo kurpa, mónitòr bo mes regularmente i chèk kon bo ta sinti bo mes. Si bo ripará ku bo tin pensamentunan di rabia, di tristesa, di depreshon òf pensamentunan ku ta kansa bo di tal manera ku bo ta sinti bo kansá ya pa un temporada kaba, e or’ei sigur ta bale la pena pa skibi pa bo mes. Kuminsá simpel. Kohe un pèn i un papel i skibi un pregunta pa bo mes. Un ehèmpel: “Kon mi ta sinti mi awor aki i kon bin mi ta sinti mi mes asina?”. Skibi tur kos ku drenta bo kabes (pensa riba e papel na moda di papia) i ora bo ta kla bo mes tin mag di disidí si bo ta sker e papel i tir’é afó òf si bo ta ward’é. E kos akí ta bal oro!

5. Kambia struktura di nos ret selebral

Dor di skibi algu regularmente, nos ta kambia e struktura di nos ret selebral.
Ora ku bo skibi e mes un kos regularmente, bo ta kambia i oumentá bo vishon outomátikamente di loke ku bo ta skibi regularmente. Si bo sa skucha loke ku diferente ‘influencers’ i ‘motivational speakers’ ta bisa, bo sa tende nan ripití diferente biaha ku e ta un ‘millionaire’s mindset’, pues un mentalidat di un mionario pa skibi bo metanan tur dia. Diferente buki, por ehèmpel e buki “Think and Grow Rich” di Napoleon Hill, ta deskribí kon ta sumamente importante pa skibi bo metanan tur dia ku pèn. Pues si bo tin un meta importante ku bo ke logra, por ehèmpel start bo mes negoshi, e ora ei esaki ta e señal pa bo kuminsá awe mes ku skibi bo metanan! Pabien di antemano, pasó dor di nota tur kos riba papel, bo ta oumentá e posibilidat ku e lo pasa di bèrdat.

6. Strukturá bo pensamentu

Dor di skibi, bo ta strukturá bo pensamentu di moda ku bo por mira kosnan mas kla. Asina aki bo por prioritisá i disidí kiko ta mas mihó pa hasi awor aki òf kiko por warda un ratu. Pensa por ehèmpel riba bo ‘To Do list’. Te na e momento ku bo a skibi esaki, tur bo kosnan di hasi ta keda bula rònt den bo kabes. Tin ora hasta ku e riesgo ku bo ta lubidá un di nan. Dor di tin un ‘To Do list’, bo ta pone un paso den direkshon di kaba e trabou. Simplemente no ta sabí pa pensa ku bo selebre ta un blachi di anotashon. Presis esaki ta e motibu pakiko hopi hende sa bisa ‘mi ta drùk’, siendo ku bon mirá, kasi sigur nan no a purba di strukturá e kosnan den nan kabes dor di skibi nan.
Ami semper ta bisa “bisa ku bo ta drùk” ta un tiki “hasiment’i drùk“, pasó nos por tuma kòntròl di loke nos ta hasi tur dia. Si bo tin diferente kos di hasi riba un dia, ta bon pa skibi nan pa evitá ku nan ta keda dal rònchi den bo kabes. Skibimentu ta yuda bo saka tareanan for di bo kabes i strukturá nan den un órden lógiko.

7. Komunikashon verbal ta mas fásil si bo skibié promé

Dor di skibi loke ku bo ke bisa, bo ta obligá bo mes pa pensa tokante di loke ku bo konta e persona òf grupo di hende. Komunikashon verbal no ta solamente ora nos ta papiando ku amigu, famia, kolega òf sosio. Komunikashon ku boka tambe ta ora ku bo mester duna un presentashon tokante di un proyekto òf un charla (spreekbeurt) na skol. Pues, skibimentu ta e preparashon perfekto, ora bo ta bai tin un kombersashon importante òf duna un presentashon, pasó e ta yuda bo strukturá loke bo ke bisa i tambe kon bo por kaba bo charla (bon). Mi a yega di lesa ku Steve Jobs tabata skibi tur su charlanan i praktiká nan dilanti di spil promé ku e presentá nan na su públiko.

8. Skibimentu ta ‘boost’ bo kreatividat

Si bo ke saka mas for di bo kreatividat, bo por kuminsá praktiká i skibi regularmente ku bo otro man (pues no ku bo man ku ta dominá). Entretantu nos sa kaba ku skibimentu tin un konekshon direktamente ku nos selebre. Nos selebre ta konsistí entre otro di un parti robes (links) i un parti drechi (rechts). Pa basta aña tin bisá ku kada parti di nos selebre ta influenshá sierto kos den nos kurpa. Por ehèmpel e parti robes ta influenshá kosnan manera (re)konosementu di palabra, kapasidat analítiko, lógika, sekuensha (volgorde), lèter i sifra. Siendo ku nos parti drechi ta manehá e banda robes di nos kurpa i ta hunga un ròl grandi den nos emoshonnan, evaluashon espasial, koló, müzik, ritmo, dimenshon etc. E man no-dominante aparentemente ta konetktá na e parti di selebre no-dominante. Na momento ku bo usa bo man no-dominante, tur dos parti di selebre ta ser praktiká, ku por tin konsekuensha ku bo ta bira mas kreativo i ku bo ta kambia bo manera di pensa. Si ta bèrdat ku tin un diferensia asina grandi den e partinan di nos selebre, ta keda e pregunta. Resientemente mi a mira e video aki riba YouTube ku ta tira un otro lus riba e pensamentu aki.

9. Oumentá e posibilidat pa logra bo metanan dor di skibi nan

No ta importá si ta trata di metanan grandi òf chikí, na momentu ku bo skibi nan bo ta oumentá e posibilidat di logra nan di bèrdat. Segun research/investigashon di Dominican University na California, e chèns ku bo ta logra bo metanan na momentu ku bo skibi nan ta 42%. Tareanan di tur dia, ami ta yama metanan chikitu, pues e kosnan riba bo ‘To do list’. I pa metanan grandi mi ta referí na kosnan manera, kumpra un outo nobo, kambia e interior kompleto di bo sala, kuminsá bo propio negoshi etc. 

10. Ventaha riba e nivel empresarial

Hendenan ku por skibi bon tin un ventaha riba e nivel empresarial.
Laga nos ta franko. Si un wèpsait òf un anunsio di un negoshi no ta deskribí kla loke e tin di ofresé, e negoshi no ta ègt parse realmente profeshonál, òf no? Si bo hasi un pregunta via di mail, i e negoshi kontestá bo mitar òf kisas no reakshoná mes, esaki no ta algu bon. Na kantor òf na un konsulotrio (di dòkter) tambe ta bon si e personanan di kontakto por komuniká kompletamente i korektamente ku kliente i pashènt. Esaki ta sigurá ménos preshon di trabou, ménos retraso innesesario, i mas produktividat. No solamente ora ta trata di komunikashon eksterno (kliente), pero tambe ora di komuniká interno, pues ku otro kolega òf departamentu, skibimentu kla ta sumamente importante. Skibiendo bon i kla loke ku bo ke bisa, tin e konsekuensha ku esun ku mester lesa bo mensahe no ta pèrdè tempu i energia na purba di komprondé loke ku “bo tabata ke men”.

11. Skibimentu ta importante pa desaroyo di mucha

Ta bèrdat ku mi ta di opinion ku skibimentu ta bon i importante pa tur hende, ni maske kuantu aña bo tin. Tòg mi ke para ketu un ratu na kon importante skibimentu ta pa desaroyo di un mucha. Dor ku durante di skibimentu tin diferente aspekto ta hunga un ròl, skibimentu ta importante pa e desaroyo pa diferente abilidat. Pensa por ehèmpel riba puntonan manera atenshon/fókùs, konsentrashon, memoria i organisashon. Tambe skibimentu ta hunga un ròl grandi den kordinashon di movementu di nos múskulonan i e desaroyo di un motórika fini (moveshon presis). Pa bo por skibi, bo mester di un kordinashon di bo brasanan, mannan i dedenan pa bo por realisá e movementunan difísil akí. Pues bo por bisa ku skibimentu ta forma un fundeshi importante pa un mucha por sigi siña i desaroyá mas abilidat.

12. Ideanan ta bira mas kla i nan ta kapturá

Pa kiko mas, skibimentu ta importante? Ora ku un idea ta solamente den bo kabes ainda, bo por mira solamente un parti chikí di e idea. E momentu ku bo skibi bo idea, bo ta kapturá esaki i mes ora bo ta krea mas espasio den bo kabes, pa bo por pensa di otro kos importante ku tambe ta konektá na bo idea (ku ya bo a skibi i no por lubidá mas). Tur idea importante ku a desaroyá i bira por ehèmpel un produkto nobo, un presentashon, un ‘video clip’, un reunion òf ‘podcast’, kasi tur biaha a skibi e idea promé. Asina aki bo ta aklará e idea, kompartí diferente tarea pa logra e meta. Ke men, hasi bo mes e fabor di skibi tur bo ideanan!

13. Redusí e influensha di prekupashon i miedu, dor di skibi nan

Mi a menshoná esaki den e artíkulo akí kaba, pero mi no por ripití sufisientemente kon importante skibimentu ta pa kosnan ku ta prekupá nos òf hinka miedu den nos kurpa. Hopi biaha ta asina ku kosnan ta mas grandi den nos kabes, ku nan ta di bèrdat. Dor di skibi tokante di e kosnan akí pa bo mes, bo ta krea un ‘helicopter view’ riba e loke ku ta kansa bo. (Un hèlikòpter tin un bon bista riba e mundu bou di dje). Ora bo skibi e puntonan ku ta kansa bo kabes, bo ta redusí nan efekto outomátikamente. Serka sierto hende e ta yuda pa na final nan sker òf kima e papel ku nan a skibi riba dje. Otro hende ta preferá di por lesa bèk despues di un tempu, e kosnan ku nan tabata tin miedu di dje òf ku tabata kansa nan mentalmente. Djis purb’é i wak kiko ta traha mas mihó pa bo. Ta djis un pèn, un papel i bo mes bo mester!

14. Mehorá bo abilidatnan sosial

Dor ku skibimentu ta un hèrmènt importante na momentu ku nos skibi nos pensamentunan, outomátikamente esaki tin influensha positivo riba nos abilidat sosial. Debí ku skibimentu ta obligá nos di pensa mas poko poko tokante di un sierto tema, outomátikamente bo ta strukturá detaye di e tema. Ora bo skibi regular, bo selebre ta haña práktika pa strukturá situashonnan mes ora, i esaki ta pone bo skucha loke un hende ta bisando. Tambe e ta yuda redusí miedu den sierto situashon i e ta duna bo mas kurashi pa defendé bo opinion òf pone atenshon na e sintimentu di otro hende na momentu ku esaki ta nesesario.

15. Skibimentu ta un ehersisio mental hopi bon

Nos selebre ta adaptá su mes kontinuamente na loke nos ta ‘dun’é di kome’. Bo por kompar’é ku ehersisio pa bo kurpa ora bo ta bayendo ‘gym’. Ta yega un momentu ku bo kurpa a kuminsá funshoná mihó, pasó bo a krea mas múskulo i bo tin mas forsa dor di praktiká regularmente. Manera bo stòp di praktiká, bo múskulonan ta bira slap bèk. Nos selebre ta traha meskos i nos selebre por haña práktika tur dia dor di skibi tur dia un tiki. Skibimentu regular ta tene bo selebre skèrpi i aktivo. I e por tin hasta un efekto preventivo di enfermedatnan manera Alzheimer òf demensia.

16. Skibimentu ta konektá!

Esaki ta mi favorito!
Pakiko skibimentu ta importante? Pasó kon dushi ta pa risibí un mensahe skibí di un ser kerí. Òf pa djis lesa e papel di plak riba bo frishidèl kaminda bo yu a skibi “Mama / Papa, mi stima bo”. Dia mi tabata bai ‘padvinderij’, diferente biaha ‘padvinders’ di otro pais tabata bishitá nos. Dor di esaki mi a haña un “pen-friend” ku tabata biba na Aruba. Hopi kontentu mi tabata, kada biaha ku mi a risibí un envelòp ku mi nòmber i stampía di Aruba riba dje, den nos brívenbùs. Skibi pa konektá ku otro hende por ta hopi simpel òf hopi amplio. E mensahe semper ta krea un sonrisa i esaki ta ‘priceless‘!

Pregunta?

Si bo tin pregunta òf komentario tokante ‘Pakiko skibimentu ta importante’, por fabor manda mi un mensahe.

Si bo tin mester di skibi algu, i bo no ta sali afó, tuma kontakto ku mi. Mi ta kontentu pa yuda bo formulá bo mensahe.